ពិធីជួបសំណេះសំណាលជាមួយថ្នាក់ដឹកនាំយុវជនស្ម័គ្រចិត្តគ្រីស្ទបរិស័ទកម្ពុជា
ចេញផ្សាយថ្ងៃទី២៦ ខែកុម្ភៈ ឆ្នាំ២០២៦
នាល្ងាចថ្ងៃពុធ ៩កើត ខែផល្គុន ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២៥ ខែកុម្ភៈ ឆ្នាំ២០២៦ ឯកឧត្តម ហ៊ឺ វីរៈ ប្រធាននាយកដ្ឋានជំរុញចលនាវប្បធម៌ សាសនា និងប្រវត្តិសាស្ត្រ នៃសហភាពសហព័ន្ធយុវជនកម្ពុជា បានដឹកនាំក្រុមការងារជួបសំណេះសំណាលជាមួយថ្នាក់ដឹកនាំយុវជនស្ម័គ្រចិត្តគ្រីស្ទបរិស័ទកម្ពុជា ប្រមាណជាង ៣០០រូប នៅសាកលវិទ្យាល័យឯកទេសនៃកម្ពុជា។
ជំនួបសំណេះសំណាលនេះ រៀបចំឡើងក្នុងគោលបំណងបង្កើនឱកាសប្រាស្រ័យទាក់ទងគ្នា រាប់អានគ្នាកាន់តែជិតស្និទ្ធ ពិភាក្សាផ្លាស់ប្ដូរទស្សនៈ គំនិតយោបល់ ចែករំលែកបទពិសោធន៍ល្អៗ និងពង្រឹងកិច្ចសហប្រតិបត្តិការ ដើម្បីរួមចំណែកដល់ការលើកស្ទួយសុខដុមនីយកម្មសាសនាទាំងអស់នៅកម្ពុជា។
នាឱកាសនេះក៏មានការឡើងអានរបាយការណ៍ស្វាគមន៍ ដោយលោកគ្រូ អ៊ួង យូហាន ប្រធានក្រុមប្រឹក្សាបណ្ដាញព្រះវិហារគ្រីស្ទបរិស័ទកម្ពុជា ដោយបានរំលេចពីការចូលរួមចំណែកជាមួយរាជរដ្ឋាភិបាលកម្ពុជា និង ស.ស.យ.ក. តាមរយៈសកម្មភាពមនុស្សធម៌ និងសប្បុរសធម៌កន្លងមក លើវិស័យអប់រំ សេដ្ឋកិច្ច សុខាភិបាល អភិវឌ្ឍន៍ជនបទ សង្គមកិច្ច បរិស្ថាន និងវិស័យកសិកម្មជាដើម។
ទន្ទឹមនឹងនេះមានការឡើងធ្វើបទបង្ហាញអំពី "សហភាពសហព័ន្ធយុវជនកម្ពុជា" ដោយ ឯកឧត្តម ឈួរ សុបញ្ញា អនុប្រធាននាយកដ្ឋានជំរុញចលនាវប្បធម៌ សាសនា និងប្រវត្តិសាស្រ្ត និងបទបង្ហាញស្ដីពី "នាយកដ្ឋានជំរុញចលនាវប្បធម៌ សាសនា និងប្រវត្តិសាស្រ្ត" ដោយ ឯកឧត្តម ជាង សិឡាសុមាឫទ្ធិវង្ស សមាជិកនាយកដ្ឋានជំរុញចលនាវប្បធម៌ សាសនា និងប្រវត្តិសាស្រ្ត ជូនអង្គពិធីផងដែរ។
បន្ថែមលើនេះទៅទៀត ឯកឧត្តមប្រធាន បានផ្ដល់អនុសាសន៍មួយចំនួនជូនដល់អង្គពិធីរួមមាន៖ បន្តចូលរួមការងារមនុស្សធម៌ សប្បុរសធម៌ និងព្រឹត្តិការណ៍សង្គម តាមការអំពាវនាវ របស់ប្រធាន ស.ស.យ.ក. ខេត្ត បន្តខិតខំប្រឹងប្រែងរៀនសូត្រឱ្យមានចំណេះ ជំនាញ ជាពិសេសសម្របខ្លួនឱ្យទាន់ទៅនឹងបរិបទឌីជីថលនាពេលបច្ចុប្បន្ន និងបំពេញការងារឱ្យមានប្រសិទ្ធភាពដើម្បីជួយសង្គមមានការអភិវឌ្ឍជាបន្តបន្ទាប់ ព្រមទាំងបន្តចែករំលែកអំពើល្អ សេចក្ដីស្រឡាញ់ ដាស់តឿនគ្នាទៅវិញទៅមក មានការយោគយល់អធ្យាស្រ័យ រួមរស់ជាមួយគ្នាដោយសុខរមនាផ្នែកសាសនា ក្នុងនាមជាសាសនិកគ្រីស្ទ។
ជាកិច្ចបញ្ចប់ ឯកឧត្តមប្រធាន បានថ្លែងអំណរគុណ និងកោតសរសើរ លោកគ្រូគង្វាល លោក លោកស្រី និងគ្រីស្ទបរិស័ទទាំងអស់ ដែលបានសហការគ្នា និងខិតខំចំណាយពេលវេលាដ៏មានតម្លៃរបស់ខ្លួន ឧបត្ថម្ភគាំទ្រ ក្នុងការចូលរួមបម្រើតាមព្រះវិហារ ក្រុមជំនុំ និងជួយដល់សហគមន៍ តាមរយៈការរួមចំណែកក្នុងការរក្សានូវសុខសន្តិភាព និងសកម្មភាពល្អៗជាច្រើន ដើម្បីបម្រើដល់ផលប្រយោជន៍ជូនបងប្អូនប្រជាពលរដ្ឋរស់នៅប្រកបដោយសុខុមាលភាពក្នុងសហគមន៍យើង។ ជាមួយគ្នានោះ ឯកឧត្តមប្រធាន បាននាំយកអំណោយដ៏ថ្លៃថ្លារបស់ ឯកឧត្ដម ហ៊ុន ម៉ានី ប្រធានសហភាពសហព័ន្ធយុវជនកម្ពុជា ជាសៀវភៅសរសេរ ស.ស.យ.ក. ចំនួន ៣០០ ក្បាល ជូនដល់សមាជិក សមាជិកាក្នុងអង្គពិធីផងដែរ៕
